Саха Өрөспүүбүлүкэтин Ил Дарханын Ыйааҕа "Саха Өрөспүүбүлүкэтигэр гражданнар сорох категорияларын социальнай өйөбүлүн туһунан"

Саха Өрөспүүбүлүкэтин Ил Дарханын Ыйааҕа "Саха Өрөспүүбүлүкэтигэр гражданнар сорох категорияларын социальнай өйөбүлүн туһунан"

20:38
21 апреля 2017

Гражданнар кыаммат категорияларын өйүүргэ аадырыстаах социальнай көмөнү күүһүрдэр, үлэтэ суох буолуу таһымын намтатар, дьадайыыны утары охсуһарга тумус тутуллар хайысха быһыытынан бэйэ дьарыктаах буолуутун сайыннарар туһуттан у у р а б ы н:
1.    Саха Өрөспүүбүлүкэтин Бырабыыталыстыбата (Чекин Е.А.):
1.1. Социальнай өйөбүлгэ ураты наадыйар гражданнары чопчулуур быһаарыыларга олохтоох бэйэни салайыныы уорганнара кытталларын хааччыйарыгар уонна маннык хайысхаларга сайабылыанньаны ылыыны тэрийэригэр:
олох уустук быһыытыгар-майгытыгар түбэспит кыаммат ыалга уонна кыаммат соҕотох олорор гражданнарга аадырыстаах материальнай көмөнү оҥорорго;
социальнай хантыраакка олоҕуран кыаммат ыалга уонна кыаммат соҕотох олорор гражданнарга аадырыстаах социальнай көмөнү оҥорорго;
Саха Өрөспүүбүлүкэтин тыатын сиригэр төлөбүрдээх уопсастыбаннай үлэни тэрийэргэ;
үлэтэ суох гражданнар бэйэлэрэ дьарыктаах буолалларын ситиһэргэ биир кэмнээх үбүнэн көмөнү оҥорууну тэрийэргэ;
үлэ көрдүүргэ ыарахаттары көрсөр үлэтэ суох гражданнары быстах үлэнэн хааччыйыыны тэрийэргэ.
1.2. 2017 сыл от ыйын 01 күнүттэн көрөргө:
наадыйыы киритиэрийин туттан, оҕолоох гражданнарга ый аайы оҕоҕо бэриллэр босуобуйа кээмэйин 1,5 төгүл улаатыннарарга;
олох уустук быһыытыгар-майгытыгар түбэспит кыаммат ыалга уонна кыаммат соҕотох олорор гражданнарга аадырыстаах материальнай көмөнү оҥорор тэрээһиннэри үбүлээһин кээмэйин 2 төгүл улаатыннарарга;
үлэтэ суох гражданнар бэйэлэрэ дьарыктаах буолалларын хааччыйар тэрээһиннэри үбүлээһин кээмэйин 3 төгүл улаатыннарарга;
Саха Өрөспүүбүлүкэтин тыатын сиригэр төлөбүрдээх уопсастыбаннай үлэни хааччыйар тэрээһиннэри үбүлээһин кээмэйин 3,5 төгүл улаатыннарарга;
үлэ көрдүүргэ ыарахаттары көрсөр үлэтэ суох гражданнары быстах үлэнэн хааччыйар тэрээһиннэри үбүлээһин кээмэйин 7 төгүл үрдэтэргэ.
1.3.  2018 сылтан көрөргө:
нэһилиэнньэ электричествонан ититинэригэр чэпчэтиллибит тарыып олохтоммут муниципальнай улуустарга олорор гражданнар сорох категориялара олорор дьиэлэрин электричествонан ититэр тиһиккэ холбоноллоругар биир кэмнээх аадырыстаах көмө тэрээһиннэрин үбүлүүргэ 25,0 мөл. солкуобайы;
социальнай хантыраакка олоҕуран кыаммат ыалга уонна кыаммат соҕотох олорор гражданнарга аадырыстаах социальнай көмөнү оҥорор тэрээһиннэри үбүлээһин кээмэйин 1,5 төгүл улаатыннарарга.
1.4. Олохтуурга:
Саха Өрөспүүбүлүкэтин судаарыстыбаннай бас билиитигэр киирэр музейдарга 18-гар диэри саастаах оҕолор босхо сылдьалларын;
5 уонна онтон элбэх оҕолоох ыал сокуоннай саастарын туола илик оҕолоро Саха Өрөспүүбүлүкэтин судаарыстыбаннай бас билиитигэр киирэр култуура уонна спорт тэрилтэлэригэр босхо сылдьалларын;
Саха Өрөспүүбүлүкэтин судаарыстыбаннай бюджетыттан атын да бюджеттар ыккардыларынааҕы куонкуруска олоҕуран сыл аайы бэриллэр трансфертартан гражданнар тыа хаһаайыстыбатыгар бэйэ дьарыктаах буолалларыгар көмөлөһөргө тыа сирин 100 поселениетыгар кыаммат гражданнарга субсидия быһыытынан биэрэргэ анаан 1 мөл. солкуобайы биэрэргэ.
1.5. Маннык тэрээһиннэри салгыы олоххо киллэрэри хааччыйарга:
кыаммат уонна гражданнар сорох категорияларыгар гаас киллэрэллэригэр уонна олорор дьиэлэрин киинтэн ититэр тиһиккэ уонна электричествонан ититэргэ холбоноллоругар биир кэмнээх аадырыстаах материальнай көмөнү оҥоруу;
элбэх оҕолоох кыаммат ыал оҕолоругар оскуолаҕа кэтэр, спортивнай онтон да атын оҕо таҥаһын комплегын атыылаһалларыгар сыл аайы харчынан төлөбүрү биэрии;
кыаммат ыалларга саҥа төрөөбүт оҕоҕо аналлаах комплегы биэрии;
кыаммат ыаллар 3-гэр диэри саастаах оҕолорун тото аһатыыны тэрийии;
3-гэр диэри саастаах оҕолорго уонна элбэх оҕолоох ыал 6-гар диэри саастаах оҕолоругар быраас ырысыабынан атыылаһыллар эмтэри босхо биэрии;
Саха Өрөспүүбүлүкэтин судаарыстыбаннай уопсай үөрэх уонна судаарыстыбаннай профессиональнай үөрэх тэрилтэлэригэр үөрэнэр кыаммат ыал оҕолоругар чэпчэтиилээх аһылыгы тэрийии;
судаарыстыбаннай уонна муниципальнай үөрэх тэрилтэлэригэр кыаммат ыал оҕолоро эбии үөрэххэ тиксэллэрин хааччыйыы;
Саха Өрөспүүбүлүкэтин судаарыстыбаннай бюджетын суотугар күнүскү үөрэх көрүҥүнэн үөрэнэр судаарыстыбаннай социальнай көмөнү ылар устудьуоннарга судаарыстыбаннай социальнай стипендияны биэриини;
Саха Өрөспүүбүлүкэтин судаарыстыбаннай бюджетын суотугар профессиональнай үөрэх тэрилтэлэригэр күнүскү үөрэх көрүҥүнэн үөрэнэр кыаммат ыаллаах устудьуоннарга сылга биирдэ үөрэнэр сирдэриттэн олорор сирдэригэр уонна төттөрү айан төлөбүрүн толуйууну.
1.6. “2017 сылга уонна 2018 уонна 2019 былааннаах сылларга Саха Өрөспүүбүлүкэтин судаарыстыбаннай бюджетын туһунан” Саха Өрөспүүбүлүкэтин 2016 сыл ахсынньы 20 күнүнээҕи 1758-С 1073-V №-дээх сокуонугар уларытыылары киллэрэр туһунан Саха Өрөспүүбүлүкэтин сокуонун бырайыагын оҥорорго бу Ыйааҕынан көрүллүбүт тэрээһиннэри олоххо киллэрэргэ аналлаах бюджет үбүн көрөргө.
2. Саха Өрөспүүбүлүкэтин олохтоох бэйэни салайыныы уорганнарыгар сүбэлээн этэргэ:
2017 сыл бэс ыйын 01 күнүгэр диэри болдьоххо бу Ыйаах 1.1. пуунугар ыйыллыбыт тэрээһиннэри олоххо киллэрэргэ Нэһилиэнньэ социальнай харыстабылын уонна нэһилиэнньэ үлэлээх буолуутун кииннэрин уорганнарын кытта ситимнээхтик үлэлиир туһунан сөбүлэһии түһэрсэллэригэр;
поселениелар, куораттааҕы уокуруктар таһымнарыгар уопсастыбаннас кыттыылаах кыаммат ыаллар кэтэх дьиэлэрин таһын уонна күрүөлэрин-хаһааларын өрөмүөннүүргэ уонна бу Ыйаах 1.1 пуунугар ыйыллыбыт тыа хаһаайыстыбатыгар кыаммат гражданнар дьарыктаах буолалларын ситиһэргэ онтон да атын тэрээһиннэргэ өйөбүлү ылааччылары чопчулуур хамыыһыйалары тэрийэллэригэр;
элбэх оҕолоох кыаммат ыал оҕолоро уопсастыбаннай транспорка чэпчэтиилээх төлөбүрүнэн айанныылларын олохтуулларыгар;
5 уонна онтон элбэх оҕолоох ыал сокуоннай саастарын туола илик оҕолоро муниципальнай бас билиигэ киирэр култуура уонна спорт тэрилтэлэригэр босхо сылдьалларын хааччыйалларыгар;
муниципальнай уопсай үөрэх тэрилтэлэригэр үөрэнэр кыаммат ыал оҕолоругар чэпчэтиилээх аһылыгы тэрийэллэригэр;
нэһилиэнньэлээх пууннар сирдэрин-уоттарын тупсарарга Саха Өрөспүүбүлүкэтин судаарыстыбаннай бюджетыттан ылбыт субсидияларын уопсай кээмэйиттэн 10 бырыһыаныттан итэҕэһэ суоҕун кыаммат ыал кэтэх дьиэлэрин таһын уонна күрүөлэрин-хаһааларын өрөмүөнүгэр ыыталларыгар.
3. Саха Өрөспүүбүлүкэтин Бырабыыталыстыбата (Чекин Е.А.) 2017 сыл от ыйын 01 күнүгэр диэри болдьоххо бу Ыйааҕынан көрүллүбүт тэрээһиннэри олоххо киллэрии бэрээдэгин уонна усулуобуйатын оҥорон бигэргэтэригэр.
4.    Бу Ыйаах туолуутун хонтуруолун бэйэбэр хаалларабын.
5. Бу Ыйааҕы дьиҥ таһымнаах сонуну киэҥник тарҕатар сириэстибэлэргэ бэчээттииргэ.


      Саха Өрөспүүбүлүкэтин 
               Ил Дархана                                                                                                                Е. БОРИСОВ  

            

Дьокуускай к.
2017 сыл, муус устар 21 күнэ
1857 №